La vita e’l mestee

L’infanzia e i primm esperienz teatraj

El Nanni Svampa l’è nassuu a Milan el 28 de febbrari 1938, in la zòna de Pòrta Venezia, da on pader ragionatt. In di ann de la guerra el s’è trasferii per on poo de ann, insemma a i parent, su le riv del Lagh Maggior, visin a Vares. Chì la trascors i ann de l’ infanzia e el gh’ha avuu l’occasion de vegnì a contatt cont on mond contadin provinzial ammò viv e genuin, che poeu l’ha mai desmentegaa, e che anzi el gh’è servii, come spunt e riferiment in del cors de la soa carriera e che tant ben el gh’ha faa per la soa formazion artistica.

Finida la guerra l’è tornaa a Milan, l’ha faa i scoeul e dòpo el Liceo Scientifico, per volentà del sò pader, el s’è iscritt a l’Università Bocconi, dove el gh’ha ciapaa, prima de partì militar, ona laurea in Economia e Commercio, che poeu che la ghe sarà minga tròpp util in la vita de l’artista.

La soa prima esperienza cont el mond musical e teatral de allora, l’è stada in del 1959, quand l’era ancamò on student de la Bocconi, ch’el se esibiva cont on gruppet de amis universitari, che se ciamava “I Soliti Idioti”. Poeu, in del 1960, el fa part del primm spettacol teatral ver e propi de la soa carriera, e l’ha ciapaa part insemma a on par de amis de l’Università, tra cui el Nuccio Ambrosino, ad ona satira musicale: “Prendetele con le pinze e martellateli”, che l’è staa rappresentada al Piccolo e al Gerolamo.

Dopo i primm esperienz, che el stess Nanni el definiss “on poo goliardici”, succed el sò inconter con la canzon seria, quand intorna al 1960, l’ha discovert i canzon del Georges Brassens. El sò desideri l’e subit quell de fàll cognoss de pù a la gent ch’el saveva minga. L’è staa inscì che quand l’han ciamaa militar e l’è partii a fa l’autiere in di servizi ausiliari, Svampa, per fa passaa el temp di longh serad lontan de cà, el s’è mess a tradur i test di canzon frances del Brassens in milanes. Ona scelta artistica che la contribuirà a fall vicinaa a la canzon popolar milanesa e al dialett de la soa città.